San Nicolas Academy of Mainit: Alma Mater

Dili marmol. Dili sab kon carpeted an corridors. Wayay kaugalingon gym, way aircon na audio-visual room. Hangtud kuman, waya kapintali na kahoy ra gihapon an nagtindog sa tunga nan lungsod. Bisan an ngayan, nag-anam na kaukang an pintal. Kon kusog an uyan, mabasa gamay an sayog. Kon maglunop an danaw, makakita kaw nan hinayhay nan mga namakwit. Unoy ikapasigarbo? Daku-dako na ground, suod sa simbahan sanan grotto nan Mahal na Birhen. Kasagaran sa estudyante, bagtason ra (mas gana magbagtas sa una kon iban an crush). Sa ato pa, menos an polusyon na nahiambag sa global warming. Dimodo kay gamay ra an populasyon, magkilay-anay gadjud gikan sa First Year hangtud Fourth Year.

Kay regular iskedyul man an pag-rosaryo, an iban an tinuod aja ra kapugos mag-ampo. Kay waya may school guard, dali ra sab an pagsibat. Kay suod ra sab sa tiyangge, kon tabo didto maghagudhod. Dimodo kay Katoliko na eskuylahan, dili mawaya an retreat sanan recollection, sanan an tinuwaway. Pagkahuman, bugoy ra man gihapon pwera ra lamang sa mga nilugdang gadjud an pamalandong ni Brother.

Kahayag sa kayag pero kon maduyom, kay ya may suga (jaon na siguro kuman), an ganahan magpadugyom, jadto ubos sa landong sa mga bitoon – naghinunghungay, nag-ginitikay. Amo ini an eskuylahan na ako tag-gradwitan, lakip na an mga kabuang. Kahoy na eskuylahan, puthaw na panglantaw. Ako isa ka alumnus, ya pay nahimo gawas sa pagtudlo kaniadto. Naningkamot ra lamang na magbinut-an. Hibayo ako, an iban didjo, sige taya nan lotto – ma UP graduate man o MSU. An iban sab, jadto, sige pala nan snow nan ila grahe sa laing nasud. Amo man lamang, may kwarta o waya, engineer o fulltime nanay, blogger o labasera, molingi man gadjud sa SNA na may pahiyom sanan pasalamat, bisan hamok na utang na papel an waya pa intawon kabayari.

Wayay nay kasipugay. Nakahuman o waya, gunit lamang sa mga pangandoy daya paninguha. Kondili, ipasa iton sa sunod na henerasyon. Kon nahisukamod kaw, hala, bangon. Sa mga SNA Graduates of 2009 – CONGRATS! Bugsay sa danaw nan idjo pangandoy. Kon kapujon, taghoy-taghoy lamang panagsa. Pagawas nidjo sa kahoy na eskuylahan – bato, puthaw, aluminum, marmol, carpet an idjo gid-an, hawiran, ingkuran. Dream big. God is big. More noble if you can dream for God. Pero ladjo-ladjo na ini na biyahe sanan way tayaay sa lotto. Pakapin ra lamang – hinaut na an seremonyas dili sa simbahan parehas sa amo sa una kay an simbahan, para man intawon sa tanan maninimba. Amo ra. Happy Graduation, SNA!

__________________

Photo credit: Lumon Zimm nan Pidjanga Blogspot