Alyansa Mamuyangay (Sinurigao Post)

Ini na, nagsugod na sab an kabibo sa baryo. Ako lamang ini binisay-on kay basin molaong an ako  mga ig-agaw na way kana kay ininglis, dili masabtan nan ila mga klasmits sa buyangan. Motoo kaw na dili hisabtan na inin ako mga ig-agaw mga nagpaka-gradwet man iton na kolehiyo?

Hamok an ako pangutana nan paghidungog ko nan ini. Sin-o may una nakahuna-huna nan ini? Politiko ba kaha o mga ordinaryo na mamuyangay samtang naghigop-higop nan sabaw nan nilat-an na bihag na may pahilis na Emperador? Butang ta politiko an nagpalujo nan ini, dili man siguro lisud imajinon na aja gadjud magpa-pansin para ibigin kintahay nan mga mamuyangay. Kon ini na ideya gikan mismo sa kuno ubos pero nagkanat an kwarta na hut-ong nan ato katilingban, posible pa na katuohan an ila reklamo na tagaan sab sila nan bentaha sa Kongreso. Pwede sab na aja na ini sakji nan mga politiko kay hibayo na man kita, hapit na an eleksyon.

Nahikatawa ako sa pangutana ni Arnold Clavio sa ila promotor na an ngayan si Nid Anima (way kataw-anay nan ngayan): “Uman badja, dili pa igo na adto kamo magpatabang sa mga Kongresista na mamuyangay sab?” Hahaha. Ya pay labot an mga gobernador sanan mayor sa pangutana.

Balitaw, lain-lain man siguro an ato reaksyon: an iban, aja taas an kilay (kon may kilay pa ayang ayang man); an iban magpibuhakhak rakan bahala pungag; an iban, aja kayot sa uyo sanan buhok bisan nipis na; an iban, amo ra lamang gihapon, hamok an pangutana. An iban sab – “utot nila, umay dako kon maghagudhod tanan list-party sa Malakanyang” (klaro gadjud na way panhimangkaagan kay imbes Kongreso, adto man idasok sa Malakanyang). Kon jaoy nangalipay nan ini, wayay lain kondili an mga mamuyangay mismo.

Pero an ngayan na “mamuyangay” lain-lain badja an kategorya. Amo ra gud nan “manginumay” – jaoy grabe ka palabayong, jaoy moinum ra lamang kaisa sa isa ka semana, jaoy modimdim ra lamang nan isa ka pilsen pag-uli nan bayay gikan sa tarbaho, jaoy moinum ra kon may okasyon parehas nan kasal, bunyag, lubong sanan kasal, bunyag lubong (tagtudjo ko ini). An pinaka-grabe – jaon modayag pa nan sanggutan bisan bayong na karadjaw. Nan kuman kay inin lain-lain na klase nan “manginumay” kay lain-lain man sab an mga interes pampersonal, an tarbaho, an mga ranggo sa katilingban, an tag-gikanan na pamilya, an mga koneksyon. Kon pananglitan adja sab sila mag-organize nan Alyansa nan Palabayong, an pangutana – kanin-o man interes an gusto protektahan o kaha dugangan pa – an kan manager nan bangko na Bouchard ra an imnon, o kan iyo na sige ra inom kay nagpinuluho pagpangita nan tarbaho?

Dili ako kon mamuyangay pero hibayo sab gamay nan inin buyang. Parehas sa mga manginumay – jaoy adik nan buyang na magdukag an alima kon dili makagunot nan manok, kwartahan, mga opisyales nan gobyerno, mga young professionals pero estambay, mga igo ra mag-atiman nan manok kay swerte an alima pirmi daug, tig-timpla nan hilo para sa tari, mga sindikato. Kuman, kanin-o man interes an protektahan pa o kaha dugangan pa sanan uno man ini na mga interes? Kamo ra kay paigo sa idjo tubag. Ajaw lamang ako palat-a nan bihag kay kahas iton nan gasul hahaha.

—————–

Photo credit: mattplask